(James Hogg)
Oh Willie was a wanton wag
The blithest lad that e'er I saw
He 'mang the lasses bure the brag
And carried aye the gree awa'
And was nae Willie weel worth goud
When seas did rowe and winds did blaw
And battle's deadly stoure was blent
He fought the foremost o' them a'
Wha has nae heard o' Willie's fame
The rose o' Britain's topmost bough
Wha never stained his gallant name
Nor turned his back on friend or foe
And he could tak' a ranting glass
And he could chant a cheery strain
And he could kiss a bonnie lass
And aye be welcome back again
Though now he wears the British crown
For whilk he never cared a flee
Yet still the downright honest tar
The same kind-hearted chiel is he
And every night I fill my glass
And fill it reaming to the brim
And drink it in a glowing health
To Adie Laidlaw and to him
I've ae advice to gie my king
And that I'll gie wi' right good-will
Stick by the auld friends o' the crown
Wha bore it up through good and ill
For new-made friends and new-made laws
They suit nae honest hearts ava
And Royal Willie's worth I'll sing
As lang as I hae breath to draw
(as sung by The McCalmans)