(Trad)
Tae ma hi tum do tae ma hi tum day
Tae ma hi tae ma do tae ma hi tum day
I gaed up tae Alford fir tae get a fee
And I fell in wi' Jamie Broon and wi' him did agree
I engaged wi' Jamie Broon in the year o' ninety-one
Tae gang hame an' ca' his second pair an' be his orraman
When I gaed hame tae Guise o' Tough 'twas on an evening clear
An' oot aboot some orra hoose the gaffer did appear
I'm the maister o' this place an' that's the mistress there
An' ye'll get plenty cheese an' breid an' plenty mair tae spare
I sat an' ate at cheese an' breid till they did roon' me stare
An' then I thocht that it wis time tae gang an' see my pair
I gaed tae the stable my pairie fir tae view
An' aye they were a dandy pair a chestnut and a blue
On the followin' mornin' I gaed tae the ploo
But lang lang ower lowsin' time my pairie gart me rue
My ploo she wisna workin' weel she widna throw the fur
The gaffer says a better yin at the smiddy tae gang fir
When I got hame the new ploo she pleased me unco weel
But I thought she wid be better gin she had a cuttin' wheel
I wrocht awa' a month or twa wi' unco little clatter
Till I played up some nasty tricks and broke the tattie chapper
The gaffer he got word o' this and orders did lay doon
That if I did the like again he wad pit me frae the toon
Noo my song is ended and I won't sing any more
An' if ony o' you be offended ye can walk ootside the door
(as sung by Cilla Fisher & Artie Trezise)